المسرحية

في ناس كثير بنلاقي نفسنا بعدنا عنهم فجأة،سواء بسبب حاجة معينة خلتنا مش عايزين نتعامل معاهم ثاني او بسبب عامل الوقت. بغض النظر ان دي مشكلة بتحصل مع ناس كثير وانا من ضمنهم، بس في مشكلة ثانية: الناس اللي انت بتبقي عارف من الاول ان هييجي عليكوا وقت و مش بس مش هتتكلموا، انتوا مش هتبقوا عارفين حاجة عن بعض اصلا.، ناس كانت الحاجة الوحيدة اللي بتجمعنا بيهم هي مكان معين سواء مدرسة او جامعة.

مجرد التفكير في الموضوع بيضايقني لأنها مش حاجة حلوة انك تكون بتتعامل مع حد و في نفس الوقت متأكد ان علاقتكوا مش هتدوم. بس حاولت الاقي للموضوع تفسير، و قد كان.

ربنا له حكمة في اي حاجة بيعملها يعني اي حاجة بتحصل، بتحصل لسبب معين. انت ممكن متكنش عارف السبب ده دلوقتي و تعرفه قدام او ممكن متعرفوش خالص بس المهم انه موجود. ربنا لما بيحط ناس في طريقك، بيعمل كده عشان يوصلك رسالة او يعلمك حاجة، بمجرد ما الرسالة دي بتوصل، دور الناس دي بينتهي. في بقي ناس ثانية دورها مش بينتهي، بيفضلوا مكملين معاك عشان ربنا عايزك تبقي معاهم و شايف ان هو ده الخير ليك.

زي المسرحية كده، انت بطل مسرحيتك اللي هي حياتك، و معاك ممثلين ثانيين

. منهم اللي واخدين ادوار البطولة و منهم ادوار صغيرة و منهم اللي بيظهر في مشهد ولا اثنين

. بس في الاخر، المسرحية مش بتكمل الا لما كل الممثلين سواء ادوارهم كبيرة ولا صغيرة يكونوا موجودين.

مش كل الناس اللي بتقابلهم في حياتك مكتوب لهم انهم يكملوا فيها، ف متزعلش اما تخسر حد او متبقوش اصحاب زي زمان عشان هي حياتنا كده، ناس بتدخلها و ناس بتخرج منها علي حسب الوقت اللي ربنا يحدده.